phir taḳhayyul yuun kis ka mujh ko bahlane laga
qurb jaise duriyon ka ruup apnane laga
us ke chehre ki ziya-pashi ko shab men dekh kar
chandni to chandni hai chand sharmane laga
jaan kar toḌa kisi ne jab khilauna pyaar ka
dil koi TuuTe khilaune hi se bahlane laga
ahl-e-mahfil ki nazar men jaise ik mujrim thi main
uTh ke jab vo shoḳh pahlu se mire jaane laga
barha tark-e-ta.alluq ke liye socha magar
baḌh ke aage dil mira mujh ko hi samjhane laga
Thokaren kha kar hua mayus jab vo ghair se
zulf meri haath men le kar vo suljhane laga
dil-jalon ki saf men ai ‘nasrin’ tu bhi aa ga.i
ab tire rang-e-taghazzul men maza aane laga
Leave a Reply