tira majnun huun sahra ki qasam hai
talab men huun tamanna ki qasam hai
sarapa naaz hai tu ai pari-ru
mujhe tere sarapa ki qasam hai
diya haq husn-e-bala-dast tujkun
mujhe tujh sarv-e-bala ki qasam hai
kiya tujh zulf ne jag kuun divana
tiri zulfan ke sauda ki qasam hai
do-rangi tark kar har ik se mat mil
tujhe tujh qadd-e-rana ki qasam hai
kiya tujh ishq ne aalam kuun majnun
mujhe tujh rashk-e-laila ki qasam hai
‘vali’ mushtaq hai teri nigah ka
mujhe tujh chashm-e-shahla ki qasam hai
Leave a Reply