hai mira rang-e-suḳhan rang-e-bayan kuchh muḳhtalif
ye nashat-e-dilbari tarz-e-fughan kuchh muḳhtalif
dekhiye kis raah par chalta raha hai karvan
hain hamare raston par ye nishan kuchh muḳhtalif
jo hamare zikr ko ham se bhi poshida rakhe
ab hamen bhi chahiye ik raz-dan kuchh muḳhtalif
ek an-jani si chup hai chaar su phaili hui
chahiye ai mehrban! ik ham-zaban kuchh muḳhtalif
hai nashat-e-vasl se sarshar aalam hi sabhi
ham magar is hijr men hain shadman kuchh muḳhtalif
ham suna.en ‘shahida’ kis tarz se kis rang se
hai kahani muḳhtalif ye dastan kuchh muḳhtalif
Leave a Reply