Jahan Ko banT Kar KHushiyan Jo Muskanon Mein Rahte The

Tashna Azmi

jahan ko baanT kar ḳhushiyan jo muskanon men rahte the

vo mahlon men nahin ‘tashna’ bayabanon men rahte the

hamare ghar men laaya kaun in masnui phulon ko

yahan pahle to asli phuul gul-danon men rahte the

unhen bhi shauq-e-duniya ne ghulam apna bana Daala

hamesha gharq jo tasbih ke danon men rahte the

utar aa.e hain saḌkon par vo saghar toḌ kar apne

gham-e-dauran se be-parva jo mai-ḳhanon men rahte the

ḳhata bas ye hui sachcha.iyon se munh nahin moḌa

vagarna ham bhi us ke ḳhaas mehmanon men rahte the

viriddha-ashram men un ke aansu kaun ponchhega

hamare gaanv men jo log dalanon men rahte the

jalal aata tha jis dam ham faqiron ko to ai ‘tashna’

laraz jaate the vo bhi jo ki aivanon men rahte the