Shohrat Bukhari
rasm-e-girya bhi uTha di ham ne
aḳhiri sham.a bujha di ham ne
ek mauhum tasavvur ke liye
ruuh ki aab ganva di ham ne
darmiyan-e-dil o gulzar-e-hayat
gham ki divar uTha di ham ne
raakh bhi paa.e na koi apni
ab ke vo aag laga di ham ne
sansanate rahe taare pahron
kyuun tiri baat suna di ham ne
har kaḌi raah men har manzil par
tere hi gham ko sada di ham ne
aas ke bujhte hue sho.ale ko
tere daman se hava di ham ne
jab tujhe bhulna chaha dal ne
ik na.e gham ki saza di ham ne
koi ghuncha kisi goshe men khila
baagh men dhuum macha di ham ne
kaisi abad thi duniya ‘shohrat’
kaisi sunsan bana di ham ne
Leave a Reply