Zafar Iqbal
apne inkar ke bar-aks barabar koi tha
dil men ik khvab tha aur khvab ke andar koi tha
ham pasine men sharabor the aur duur kahin
aise lagta hai kahin takht-e-hava par koi tha
us ke baghat pe utra hua tha mausam-e-rang
qabil-e-did har ik samt se manzar koi tha
shak agar tha bhi to mitta gaya hote hote
aur ab pukhta yaqin hai ki sarasar koi tha
is dil-e-tang men kya us ki rihaish hoti
yaani andar to nahin tha mire bahar koi tha
shakl kuchh yaad hai kuchh bhuul chuki hai us ki
koi din the ki mukammal mujhe azbar koi tha
daere men kabhi rakkha hi nahin us ne qadam
aur mohabbat ke mazafat men aksar koi tha
main use chhod ke khud hi chala aaya tha kabhi
aur ab puchhta phirta huun mira ghar koi tha
yava-go tha ‘zafar’ is ahd-e-kharabi men koi
yava-go hi use kahte hain sukhan-var koi tha
Leave a Reply