Anwar Sabri
zulmaton men raushni ki justuju karte raho
zindagi bhar zindagi ki justuju karte raho
jis pe ho saaqi ba-zom-e-hosh-mandi bhi fida
us mukammal be-ḳhudi ki justuju karte raho
be-junun chalta nahin hai kar-e-tamir-e-hayat
hosh vaalo agahi ki justuju karte raho
admiyat ke siva jis ka koi maqsad na ho
umr bhar us aadmi ki justuju karte raho
shart-e-irfan-e-ḳhuda ‘anvar’ hai ḳhud apni talash
yuun to karne ko kisi ki justuju karte raho
Leave a Reply