Shakeel Gwaliari
ye silsila ghamon ka na jaane kahan se hai
ahl-e-zamin ko shikva magar asman se hai
yadon ki rahguzar se ḳhvabon ke shahr tak
ik silsila zarur hai lekin kahan se hai
meri kitab-e-zist ko aise na phenkiye
raushan kisi ka naam isi dastan se hai
manzil na paa.i main ne magar ye to khul gaya
rishta mire safar ka kisi karvan se hai
mausam ki her-pher ne sabit ye kar diya
kuchh mere jism ka bhi ta.alluq makan se hai
kahne ko log kya nahin kahte ‘shakil’ ko
sunne ka ishtiyaq tumhari zaban se hai
Leave a Reply