marne ka ḳhauf baḌhne laga iḳhtiyar se
ab zindagi utaar mujhe apni car se
itna kaha ki tujh se mohabbat hai laḌ paḌa
itna to ab mazaq bhi hota hai yaar se
main zindagi ki bus men latife huun bechta
jalne lage hain log mire karobar se
kyunki saḌak se aap ki gaaḌi guzarni hai
saare daraḳht nikle hue hain qatar se
main mutma.in huun marne vaala marega saath
bandha hai main ne saans ko bijli ke taar se
is ahd men hai pyaar ki miqdar baḌh ga.i
ik shaḳhs pyaar karne laga chaar chaar se
main ne badan ke ghar se use aaq kar diya
ik raat aankh bhagi tire intizar se
number pe us ke kitne hi message kiye ga.e
aaya na ik javab bhi parvardigar se
Leave a Reply