chand lamhon ke liye anjuman-ara.i thi
phir vahi main tha vahi raat ki tanha.i thi
chaḌhte suraj ki tavajjoh rahi saari us paar
raushni ki to udhar sirf jhalak aa.i thi
apne dil men bhi thi ta.amir-e-makan ki hasrat
apni qismat men magar badiya-paima.i thi
apne hi bojh se har Dubne vaala Duuba
varna tufan se kashti to nikal aa.i thi
chal diye bas yunhi ik saa.e ke pichhe
na ta.aruf hi tha us se na shanasa.i thi
kaun is dasht men kahta mujhe ‘mohsin’ labbaik
apni hi ḳhak-e-nava guunj ke lauT aa.i thi
Leave a Reply