main chahta huun ki har shai yahan sanvar jaa.e
tumhari ruuh miri ruuh men utar jaa.e
vo ik ḳhayal jo thoḌa malal jaisa hai
tire qarib se guzre agar nikhar jaa.e
dahak raha hai jo mujh men alaav barson se
zara sa aankh men bhar le koi to mar jaa.e
zamane-bhar se vo begana ho hi ja.ega
koi hayat ki manind jab mukar jaa.e
vo ek ḳhvab jise gungunata rahta huun
kabhi to aa ke miri aankh men Thahar jaa.e
phir us ke ba.ad main sochunga apne hone ka
jo darmiyan hai lamha zara nithar jaa.e
kabhi hamid bula.e kabhi use ‘sajid’
akela chand batao kidhar kidhar jaa.e
Leave a Reply