Poet
hansne rone se ga.e rabt baḌhane se ga.e
aisi uftad paḌi saare zamane se ga.e
vo ta.affun hai ki is baar zamin ke baasi
apne sajdon se ga.e rizq kamane se ga.e
dil to pahle hi juda the yahan basti vaalo
kya qayamat hai ki ab haath milane se ga.e
is qadar qaht-e-vafa hai mire atraf ki ab
yaar yaron ko bhi ahval sunane se ga.e
zaḳhm itne the ki mumkin hi na tha un ka shumar
phir bhi ai dost tire haath lagane se ga.e
apni qamat men falak-bos the ham log magar
ik zamin-zad ke avaz lagane se ga.e
apna ye haal ki hain jaan bachane men magan
aur ajdad jo the jaan laḌane se ga.e
tujh ko kya ilm ki ham teri mohabbat ke tufail
saari duniya se kaTe saare zamane se ga.e
Leave a Reply