ye charagar to yahan har gali men milte hain
koi batao kahan dil ke chaak silte hain
tire badan ki saba kis chaman men chalti hai
kahan pe ab tire honTon ke phuul khilte hain
faza men bikhri hain zard ansuon ki tahriren
vida-e-gul men daraḳhton ke haath milte hain
vo jin ke ashk bichhaḌte hue nahin thamte
milen bichhaḌ ke to kyon be-ruḳhi se milte hain
ghalat guman na kar meri ḳhushk ankhon par
samundaron men jazire zarur milte hain
sulag uThi hai tiri yaad men faza-e-ḳhayal
ki jaise tirgi-e-shab men phuul khilte hain
Leave a Reply