koi baagh sa saja hua mire samne
ki badan hai koi khila hua mire samne
vahi aankh hai ki sitara hai mire ru-ba-ru
ye charagh kya hai jala hua mire samne
miri ḳhvab-gah men raat kaisa ḳhumar tha
koi jaam sa tha dhara hua mire samne
main khaḌa hua tha ajiib vahm o guman men
dar-e-ḳhvab shab tha khula hua mire samne
kabhi lauT aaya main dasht se to ye shahr bhi
usi gard men tha aTa hua mire samne
mira rasta tire raste se alag hua
yahi rasta tha bacha hua mire samne
Leave a Reply