mujhe taslim be-chun-o-chura tu haq-ba-janib tha
mire anfas par lekin ajab pindar ghalib tha
vagarna jo hua us se siva.e ranj kya hasil
magar haan maslahat ki rau se dekhen to munasib tha
main tere ba.ad jis se bhi mila tikha rakha lahja
ki is be-laus chahat ke evaz itna to vajib tha
main kuchh puchhun bhi to akasr javaban kuchh nahin kahta
guzishta ek arse se jo bas mujh se muḳhatib tha
main umr-e-rafta ki baazi se itna hi samajhta huun
shikast o fat.h do harf-e-izafi khel jalib tha
Leave a Reply