aa ga.e vo mire ḳhayalon men
ghanTiyan baj uThin shivalon men
raat ko chiir kar kiran ubhri
raat ghul mil ga.i ujalon men
nigah-e-shoḳh teri kya uTThi
bijli kaundhi kamal ke talon men
ek lamha ḳhushi ka kya kam hai
zindagi kab hai maah salon men
dekh kar pal men phuul girta hua
jhurjhuri si hai husn valon men
hasil-e-zist hai vahi lamhen
jo ki guzre tire ḳhayalon men
jab kiya zikr be-misalon ka
zindagi bas ga.i misalon men
maldaron se kya milega ‘habib’
pa.ega kuchh preshan-halon men
Leave a Reply