ghaTaen Raqs Karti Hain Ye Mausam Raqs Karte Hain

Nirmal Nadeem

ghaTa.en raqs karti hain ye mausam raqs karte hain

vo zulfon ko jab apni kar ke pur-nam raqs karte hain

baḌi masti baḌi gahra.i hai un shoḳh ankhon men

unhin men mast ho kar donon aalam raqs karte hain

hava.en aane lagti hain kabhi jab un ke daman ki

diye bhi kar ke apni lau ko maddham raqs karte hain

tumhare hijr ki raton men jab tanha.i Dasti hai

baja kar apni ham sanson ki sargam raqs karte hain

baharon jhumne lagti hain un ka naam sunte hi

saja lete hain gul honTon pe shabnam raqs karte hain

miyan ham to qalandar hain hamara haal mat puchho

hamare siine men kitne hi sangam raqs karte hain

kabhi jab mil ke aate hain kahin tanha.i men un se

dariche band kar lete hain aur ham raqs karte hain

hazaron bijliyan sadqe men un ke TuuT jaati hain

pahan ke nuur ki paa.el jo hamdam raqs karte hain

‘nadim’ apni ada aisi hai jis ke samne aa kar

ḳhushi mad.hosh ho jaati hai aur gham raqs karte hain