Arzoo Lakhnavi
mire josh-e-gham ki hai ajab kahani
kabhi uThta sho.ala kabhi bahta paani
hai ḳhushi ka sauda ḳhalish-e-nihani
hai jigar ka chhala samar-e-javani
jo ḳhushi hai faani to hai gham bhi faani
na ye javedani na vo javedani
azali mohabbat abadi kahani
ki pas-e-fana hai na.i zindagani
sitam-o-raza men ye hai ahd-e-mohkam
jo tiri kahani vo mari kahani
vo uThenge tufan ki ḳhuda bacha.e
ye na.e nazare ye bhari javani
ye nigah tirchhi ye bal abruon ka
har ada hai dilkash magar imtihani
miri kashti-e-dil dam-e-ah-o-afghan
kabhi badbani to kabhi dahani
dar-e-dil se palTa har ik aane vaala
tiri yaad kya thi miri pasbani
ye tira talavvun ye badalti chitvan
ajab ik bala hai ki hai na-gahani
miri kisht-e-dil par pa-e-zhala-bari
hai saped badal aqab-e-javani
kabhi aarzu tha yahi dagh-e-hasrat
mujhe jo bana de tiri mehrbani
Leave a Reply