Shaad Aarfi
jo bhi apnon se ulajhta hai vo kar kya lega
vaqt bikhri hui taqat ka asar kya lega
ḳhaar hi ḳhaar hain ta-hadd-e-nazar divane
hai ye divana-e-insaf udhar kya lega
jaan par khel bhi jaata hai sazavar-e-qafas
is bharose men na rahiyega ye kar kya lega
pasti-e-zauq bulandi-e-nazar dar-o-rasan
un se tu mangne jaata hai magar kya lega
rahbar-e-qaum-o-vatan us ko ḳhuda sharma.e
ḳhud jo bhaTka ho vo auron ki ḳhabar kya lega
sham-e-mahfil ka baqiyya hai farogh-e-ummid
shaam se jis ka ye aalam ho sahar kya lega
baghban koshish-e-beja pe magan hai lekin
bhang bota hai jo gulshan men samar kya lega
sha.er-e-gauhar-e-be-ab-e-zamana ai ‘shad’
sher-fahmon se kabhi dad-e-hunar kya lega
Leave a Reply