Anand Narayan Mulla
ziist hai ik ma.asiyat soz-e-dili tere baghair
haan mohabbat bhi hai ik aludgi tere baghair
sham-e-gham tere tasavvur hi se ankhon men charagh
varna mere ghar men ho aur raushni tere baghair
ye jahan tanha bhala kya mujh ko de paata shikast
main ne kab khaya fareb-e-dosti tere baghair
raat ke siina men hai ik zaḳhm jis ka naam chand
ik sunahri ju-e-ḳhun hai chandni tere baghair
har-nafas hai pai-ba-pai nakamiyon ka samna
ziist hai ik mustaqil sharmindagi tere baghair
de ga.i dhoka magar sha.istagi-e-gham miri
aa raha hai dil pe ilzam-e-ḳhushi tere baghair
ilm-o-aql-o-nam-o-jah-o-zor-o-zar sab hech ishq
ho ke sab kuchh bhi nahin kuchh aadmi tere baghair
dil ki shadabi ki zamin hai tu hi ai yad-e-dost
aa na paa.i gham ke phulon men nami tere baghair
ek ik lamhe men jab sadiyon ki sadiyan kaT ga.iin
aisi kuchh raten bhi guzri hain miri tere baghair
zindagi ‘mulla’ ki hai mahjub nam-e-zindagi
rah ga.i hai sha.iri hi sha.iri tere baghair
Leave a Reply