Har Shai Mein Numayan Hai Jalwa Aankhon Se Magar Mastur Bhi Hai

Poet

har shai men numayan hai jalva ankhon se magar mastur bhi hai

shah-e-rag se qarin hai husn-e-azal shahpar se nazar ke duur bhi hai

hai parda-andar-parda vo aur arz-o-sama ka nuur bhi hai

jab yaad karo nazdik hai vo jab DhunDo us ko duur bhi hai

mahdud bhi la-mahdud bhi hai azad bhi hai majbur bhi hai

faizan-e-nazar se har zarra hoshiyar bhi hai maḳhmur bhi hai

hai zarra zarra bhi sahra hai qatra qatra bhi dariya

samjho na to aiman hai patthar patthar ko jo samjho tuur bhi hai

phir jabr-o-sitam ke saa.e men kuchh log ḳhuda ban baiThe hain

muusa hi nahin hain ab varna fir.aun bhi hai aur tuur bhi hai

jaise ghunche khil uThte hain tar ho kar ashk-e-shabnam se

dil shab-bhar hijr men ro ro kar har sub.h yunhi masrur bhi hai

kamzor hi se taqsiren hain majburi par ta.aziren hain

ye Dagar Dagar mash.hur bhi hai ye nagar nagar dastur bhi hai