kahin sho.ala kahin shabnam, kahin ḳhushbu dil par
vo saman-bu hai bahar-rang bahar-su dil par
chaman-e-ruh se ḳhushbu-e-badan aati hai
jaan par mauja-e-lab nafha-e-gesu dil par
dil ko ḳhud hausla-e-kar-e-fusun-sazi hai
ki chala tha na chala hai koi jaadu dil par
lazzat-e-did ḳhuda jaane kahan le jaa.e
aankh hoti hai to hota nahin qaabu dil par
ye tahayyur hai ki nazzara ki afsun-e-jamal
samne paikar-e-ahu ram-e-ahu dil par
is kashakash men kahan jaan ke liye ja-e-aman
dil hai mehrab-e-haram main ḳham-e-abru dil par
jaan tah-e-chashm ki yuun sair-o-tamasha hi sahi
koi mahtab nazar men koi mah-ru dil par
Leave a Reply