Poet
bahut pachhtaoge tum dard-mandon se ḳhafa ho kar
ki gul murjha ke rah jaata hai ḳharon se juda ho kar
kahan jaana tha mujh ko aur kahan la kar kiya rusva
nigah-e-shauq ne dhoka diya hai rahnuma ho kar
sitam kiije jafa kiije magar insaf se kahiye
ye narazi bhala zeba hai bande se ḳhuda ho kar
baharen ja rahi thiin jab ḳhizan ke saath gulshan se
gulon ki aankh men bhar aa.e aansu iltija ho kar
zamana gar qayamat bhi uThata hai uThane do
magar uTh kar na jaao mere pahlu se ḳhafa ho kar
ḳhayal-e-dost ḳhizr-e-rah hai dasht-e-mohabbat men
junun hamrah le jaata raha hai rahnuma ho kar
ḳhudara rahm kar paiman-e-ulfat bandhne vaale
kahan ja.unga main aḳhir tire gham se riha ho kar
na ban jaa.e tumhari zindagi ka aasra koi
na itrao kisi ki zindagi ka aasra ho kar
mujhe tufan le jaata jahan mera muqaddar tha
Duboya hai miri kashti ko tum ne naḳhuda ho kar
hamari dekha-dekhi tum vafaon par na aa jaana
zamane se hamen kya mil raha hai ba-vafa ho kar
bayan kya hal-e-dil ho jab mohabbat ka ye aalam hai
shikayat bhi mire honTon pe aati hai dua ho kar
ajab dastur hai ai ‘raaj duniya-e-mohabbat ka
jafa.en samne aa.iin vafaon ki saza ho kar
Leave a Reply