Ali Akbar Natiq
kase kajave mahmalon ke aur jaaga raat ka taara bhi
chhoḌ di basti naqon ne ḳhamosh hua naqqara bhi
chand si ankhen khel rahi thiin surḳh pahaḌ ki oTon se
purab or se taak raha tha uTh kar abr ka paara bhi
qafile gard-e-safar men Dube, ghanTiyon ki avaz ghuTi
aḳhiri uunT ki pusht pe Daala raat ne siyah gharara bhi
shahr ke chauk men virani hai aag bujhi, andher hua
raakh saron men Daal ke baiThe, aaj tire avara bhi
koi na rasta naap saka hai, ret pe chalne valon ka
agle qadam par miT ja.ega pahla naqsh hamara bhi
Leave a Reply