Fida Kar Jaan Agar Jaani Yahi Hai

Siraj Aurangabadi

fida kar jaan agar jaani yahi hai

are dil vaqt-e-be-jani yahi hai

yahi qabr-e-zulekha siin hai avaz

agar hai yusuf-e-sani yahi hai

nahin bujhti hai pyaas aansu siin lekin

karen kya ab to yaan paani yahi hai

kisi ashiq ke marne ka nahin taras

magar yaan ki musalmani yahi hai

birah ka jaan kandan hai nipat sakht

shitab aa mushkil asani yahi hai

piro tar-e-palak men dana-e-ashk

ki tasbih-e-sulaimani yahi hai

mujhe zalim ne giryan dekh bola

ki is aalam men tufani yahi hai

zamin par yaar ka naqsh-e-kaf-e-pa

hamara khatt-e-peshani yahi hai

vo zulf-e-pur-shikan lagti nahin haat

mujhe saari pareshani yahi hai

na phirna jaan dena us gali men

dil-e-be-jan ki baani yahi hai

kiya raushan charagh-e-dil kuun mere

‘siraj’ ab fazl-e-rahmani yahi hai