Shor-O-Ghul Aahen Karahen Aur Alam Paiham Tha Shad

Shmashad Shad

shor-o-ghul aahen karahen aur alam paiham tha ‘shad’

raat mere dil ki basti ka ajab mausam tha ‘shad’

barq-o-baran ki nazar mujh par rahi aThon pahar

kyon mire hi ashiyan par asman barham tha ‘shad’

saans lena bhi giran tha na-tavani par miri

hijr ka aalam bhi jaise naza.a ka aalam tha ‘shad’

badalon ki aaḌ se koi muḳhatib tha magar

lafz be-ma.ani the aur lahja bhi kuchh mub.ham tha ‘shad’

mere dil par thi musallat vahshaton ki tirgi

par inayat ka charaghan bhi zara kam kam tha ‘shad’

ansuon se tar mila har shaḳhs ka daman vahan

har kisi ke dil men pinhan jaise koi gham tha ‘shad’

apni baḳhshish ke liye tha har koi koshan vahan

main bhi saf men tha magar ba-dida-e-pur-nam tha ‘shad’