Abbas Dana
naam khushbu tha sarapa bhi ghazal jaisa tha
chand se chehre pe parda bhi ghazal jaisa tha
saare alfaz ghazal jaise the guftar ke vaqt
rang-e-iz.har-e-tamanna bhi ghazal jaisa tha
phuul hi phuul the kaliyan thiin hasin galiyan thiin
aap ke ghar ka vo rasta bhi ghazal jaisa tha
us ki ankhen bhi hasin aankh men aansu bhi hasin
gham men duuba hua chehra bhi ghazal jaisa tha
vo javani vo mohabbat vo shararat ka nasha
vo miri umr ka hissa bhi ghazal jaisa tha
fasle the na judai thi na tanhai thi
teri qurbat ka vo lamha bhi ghazal jaisa tha
vo na mera na main us ka tha magar ai ‘dana’
dhundla dhundla sa vo rishta bhi ghazal jaisa tha
Leave a Reply