Saleem Figar
har tazkira kitab men tafsil se hua
mera safar shurua hi takmil se hua
is ḳhak-dan pe phailne vaala hai ek roz
jis qahr ka zuhur kabhi niil se hua
har samt ghumti thi yahan raat ja-ba-ja
phir din tumhare chehra-e-qindil se hua
ugte hain sahilon pe kisi phuul ki tarah
kaisa ye ishq ta.eron ko jhiil se hua
ye jo tumhen ḳharab nazar aa raha huun main
paida ye mas.ala bhi kisi Dhiil se hua
ab dekhiye utarta hai kya asman se
ik faisla to pahle ababil se hua
Leave a Reply