Mirza Altaf Husain Alim Lucknowi
nuuh ka tufan ik aansu se barpa kijiye
ji men aata hai ki ab qatre ko dariya kijiye
be-ḳhabar ban ja.iye ya ahd puura kijiye
jis tarah se aap ka ji chahe achchha kijiye
isi-e-dauran sahi lekin koi shahid bhi ho
ham abhi to ji uThenge aap ishara kijiye
ho chuka hona tha jo kuchh ja.iye bas ja.iye
marne vaale ko na ab lillah rusva kijiye
phir zara jhalki dikha kar ik zara chhup ja.iye
dil ke har zarre men abad ek duniya kijiye
dil hamara hai ham is ke hain azal se raz-dar
aap ḳhud aa kar sar-e-bazar rusva kijiye
kaun kahta hai ki in qisson ko phir dohra.iye
dil ki abadi miTa kar zikr-e-sahra kijiye
razdari ishq men ‘alim’ nahin chhoTi si baat
dil hi dil men sochta rahta huun ab kya kijiye
Leave a Reply