pahunch gaya tha vo kuchh itna raushni ke qarib
bujha charagh to palTa na tirgi ke qarib
sulagti ret pe bhi us ka hausla dekho
hui na pyaas kabhi ḳhema-zan nami ke qarib
badan ke dasht men jab dafn ho gaya ehsas
vafa phaTakti bhala kaise aadmi ke qarib
hamari pyaas ke suraj ne Daal kar kirnen
kiya hai gahre samundar ko tishnagi ke qarib
jo zaḳhm-e-dil ko rafu kar raha tha ashkon se
hamare ba.ad na dekha gaya kisi ke qarib
bashar ne chand sitaron ko chhu liya lekin
ye aadmi na kabhi aaya aadmi ke qarib
hamare bachchon ke lab pyaas se hain jhulse hue
hamari laash bhi rakhna na tum nami ke qarib
ye kis ke naam se baḌhti hain dhaḌkanen dil ki
ye kaun hai mire ehsas-e-zindagi ke qarib
Leave a Reply