Koi Lashkar Ki Dhadakte Hue Gham Aate Hain

koi lashkar ki dhadakte hue gham aate hain

shaam ke saae bahut tez qadam aate hain

dil vo darvesh hai jo aankh uthata hi nahin

us ke darvaze pe sau ahl-e-karam aate hain

mujh se kya baat likhani hai ki ab mere liye

kabhi sone kabhi chandi ke qalam aate hain

main ne do chaar kitaben to padhi hain lekin

shahr ke taur-tariqe mujhe kam aate hain

khub-surat sa koi hadisa ankhon men liye

ghar ki dahliz pe Darte hue ham aate hain

Leave a Comment