phir gulab ki shaḳhen saj ga.iin qarinon se
aap bhi utar aa.en chandni ke zinon se
apni pak-bazi ka phir subut de lena
tum lahu to dho Daalo pahle astinon se
dushmanon ke ḳhemon men khul ke ja.iye sahab
haan magar bache rahiye ḳhush-ada hasinon se
un ke ariz-o-lab ko chand se na do tashbih
pattharon ko kya nisbat qimti naginon se
koi un ko ja kar ye iltimas pahuncha de
aap ko nahin dekha DeḌh-do mahinon se
ḳhush-libas maujon ne pairahan badal Daale
aap bhi zara langar kholiye safinon se
ma-siva-e-mahrumi aur kuchh nahin paaya
aqilon ki basti men mil liye zahinon se
Leave a Reply