is dasht se aage bhi koi dasht-e-guman hai
lekin ye yaqin kaun dila.ega kahan hai
ye ruuh kisi aur ilaqe ki makin hai
ye jism kisi aur jazire ka makan hai
karta hai vahi kaam jo karna nahin hota
jo baat main kahta huun ye dil sunta kahan hai
kashti ke musafir pe yunhi taari nahin ḳhauf
Thahra hua paani kisi ḳhatre ka nishan hai
jo kuchh bhi yahan hai tire hone se hai varna
manzar men jo khilta hai vo manzar men kahan hai
is raakh se uThti hui ḳhushbu ne bataya
marte hue logon ki kahan ja-e-aman hai
ye kar-e-suḳhan kar-e-abas to nahin ‘ami’
ye qafiya-paima.i nahin husn-e-bayan hai
Leave a Reply