Abbas Dana
mira khulus abhi sakht imtihan men hai
ki mere dost ka dushman miri amaan men hai
vo khush-nasib parinda hai jo udaan men hai
ki tiir nikla nahin hai abhi kaman men hai
tumhara naam liya tha kabhi mohabbat se
mithas us ki abhi tak miri zaban men hai
tum aake laut gae phir bhi ho yahin maujud
tumhare jism ki khushbu mire makan men hai
kahan milega hasinon ko daur-e-hazir men
vo shahzada jo pariyon ki dastan men hai
hai jism sakht magar dil bahut hi nazuk hai
ki jaise aina mahfuz ik chattan men hai
tujhe jo zakhm de tu us ko phuul de ‘dana’
yahi usul-e-vafa tere khandan men hai
Leave a Reply