Nasir Kazmi
girafta-dil hain bahut aaj tere divane
khuda kare koi tere siva na pahchane
miti miti si umiden thake thake se khayal
bujhe bujhe se nigahon men gham ke afsane
hazar shukr ki ham ne zaban se kuchh na kaha
ye aur baat ki puchha na ahl-e-duniya ne
ba-qadr-e-tishna-labi pursish-e-vafa na hui
chhalak ke rah gae teri nazar ke paimane
khayal aa gaya manus rahguzaron ka
palat ke aa gae manzil se tere divane
kahan hai tu ki tire intizar men ai dost
tamam raat sulagte hain dil ke virane
umid-e-pursish-e-gham kis se kijiye ‘nasir’
jo apne dil pe guzarti hai koi kya jaane
Leave a Reply