Jo Tujhe Paikar-E-Sad-Naz-O-Ada Kahte Hain

Farhat Nadeem Humayun

jo tujhe paikar-e-sad-naz-o-ada kahte hain

qadr-dan husn ke ye baat baja kahte hain

us ke chehre ki ziya se hai chamak suraj ki

us ki bikhri hui zulfon ko ghaTa kahte hain

vo jo ankhon se pila.e to chalo pi lenge

vaise ham piine pilane ko bura kahte hain

surḳh hathon ki haqiqat to hami jante hain

jo nahin jante vo rang-e-hina kahte hain

baat achchhi hi vo karte hain hamare haq men

jo hamare liye kahte hain baja kahte hain

saḳht pathrili zamin par bhi khilate hain gulab

sher ham kahte hain aur sab se siva kahte hain

ye rivayat hai zamane ki na.i baat nahin

hoti aa.i hai ki achchhon ko bura kahte hain

aaj gahvare men baiThe hain sabhi ahl-e-adab

is faza hi ko mohabbat ki faza kahte hain

ham ne ki mashq-e-suḳhan misra-e-‘ghalib’ pe ‘nadim’

log is baare men ab dekhiye kya kahte hain