Chand Akbarabadi
ḳhasta shikasta jism men dhaḌkan liye hue
phirta huun apni ruuh ki katran liye hue
ummid haare raat men mazdur so ga.e
jaage zaruraton ki vo uljhan liye hue
gulshan talak men zahr ta.assub ka ghul gaya
kal phuul bhi mila tha mujhe gun liye hue
utra jo mere dil se nazar se utar gaya
milta hai mujh se ab bhi vo utran liye hue
aa.i hai raqs karti hava mere dvaar par
savan ke giit ghunghru ki chhan-chhan liye hue
Leave a Reply