zahida-zaidi

sang-e-jaan

ab-e-khufta men

ik sang phenka to hai

daere

sath-e-sakit pe ubhre hain

phenkenge

mit jaenge

aur vo sang-e-jan

apni ye dastan

zer-e-bar jumud-e-garan

ek sang-e-malamat ki manind

dohraega

vo jis ka intizar tha

vo jis ka intizar tha

shafaq ko

badalon ko

rahguzar ko abshar ko

khizan ki pattiyon ko

chandni ko

dhuup ko bahar ko

vo jis ki aarzu thi

saaton ko

khamushi ko

zehn ko khayal ko

tasavvur-e-muhal ko

khanakti pyaliyon ko

kursiyon ko

jaam ko ko na na-tamam ko

dopahar ko shaam ko

vo jis ki ahaten samaaton ke kunj men nihan thiin

jis ka aks

jalva-rez tha

basaraton ki jhiil men

vo kya faqat safa ka surmagin khiram tha

ki shakh-e-gul ka saya-e-khafif tha

ki mauj-e-ab par kiran ka irtiash tha

jo ek pal men samne se yuun guzar gaya

ki vo sabhi jo muntazir the

aankh malte rah gae

magar vo is tarah guzar gaya

ki yak-ba-yak vo intizar ki bisat hi ulat gai

vo khel khatm ho gaya

aur us ke baad

asman se zamin

zamin se asman tak

khala khala khala khala

More Poems

Leave a Comment