hasrat-e-did rahi diid ka khvahan ho kar
dil men rahte hain magar rahte hain arman ho kar
vo mire paas hain ehsas ye hota hai zarur
is qadar duur hain nazdik rag-e-jan ho kar
hosh men laane ki tadbir na kar ai naseh
main ne paaya hai unhen chak-e-gareban ho kar
khana-e-dil hai tumhara tumhin rah sakte ho
ghair ko haq ye nahin hai rahe mehman ho kar
dar-e-janan pe pahunchna hai to is tarah pahunch
chak-dil chak-jigar chak-gareban ho kar
rukh ka shaidai hai mail-ba-asir-e-gesu
kahin kafir na vo ho jaae musalman ho kar
taar daman ke ude ishq ko mearaj mili
zeb-e-gulshan hua gul chak-gareban ho kar
aa gaya hazrat-e-sufi ke dar-e-daulat par
kya karun ab guhar-o-laal-ba-daman ho kar
lazzat-e-gham pe karun rahat-e-kaunain nisar
koi aae na mire dard ka darman ho kar
jab koi apni haqiqat se juda hota hai
thokaren khata hai duniya men pareshan ho kar
is tarah jalva dikhate hain na main dekh sakun
dil men rahte hain magar aankh se pinhan ho kar
un ka aina huun aine men hai aks-e-jamal
kyuun na dekhen vo mujhe ghaur se hairan ho kar
un ke jalvon men jo kho jaun to dhundo na mujhe
kaun milta hai kise vasil-e-janan ho kar
baad-az-marg inayat men tafriq na ki
dil men tasvir rahi aap ki ehsan ho kar
vaqt aisa bhi pada badiya-paimai men
raah men gul jo mile khar-ba-daman ho kar
Leave a Reply