ek patthar rakh liya hai sina-e-sad-chak par
zabt ka pahra lagaya dida-e-namnak par
kaun hai jis par nahin khulta mira dast-e-hunar
kis ki miTTi ek muddat se rakhi hai chaak par
chaar din men hi haqiqat ki zamin par aa gira
chaar din men bhi uḌa tha ishq ke aflak par
ye ḳhizan peḌon se patte dil se ḳhushiyan le ga.i
zor kuchh bhi chal na paaya mausam-e-saffak par
sanehe paḌte rahenge sach ke raste men hazar
ungliyan uThti rahengi lahja-e-bebak par
jo bhi aaya vo tiri ankhon ka ho ke rah gaya
ye bhanvar ab tak na khul paa.e kisi tairak par
Leave a Reply