nahin asan ki insan men farishte ki ho ḳhu paida
shikast-e-arzu karti hai tark-e-arzu paida
na dekho to qayamat tak na aa.ega nazar jalva
agar dekho to shakl-e-yar hogi char-su paida
ye na-mumkin hai nalon ka asar us sang-dil par ho
ye mumkin hai ki aahon se ho patthar men lahu paida
piyunga shadman ho kar nigah-e-mast-e-saqi se
karunga roz-e-mahshar hasil-e-jam-o-subu paida
ḳhas-o-ḳhashak ban kar jal uThega alam-e-imkan
dil-e-momin kare to nara-e-allah-hu paida
amal ka saz-e-dilaksh chheḌ kar majbur-e-gham dekhen
faza ḳhud hi karegi naghma-e-la-taqnatu paida
dil-e-ḳhurshid-e-raḳhshan men ‘bashir’ aḳhir jagah paa.i
yahan tak qatra-e-shabnam ne kar li aabru paida
Leave a Reply