daman hai mera dasht ka daman dusra
meri tarah na phade gareban dusra
yak-rang huun main us gul-e-raana ke ishq men
bulbul na huun ki dhundun gulsitan dusra
tha hi gham-e-firaq mila us men dard-e-rashk
muflis ke ghar men aaya ye mehman dusra
teri haya-e-chashm sa dekha nahin raqib
yaan ehtiyaj kya hai nigahban dusra
uryan-tanon ke sar pe tiri khak-e-ku rahe
dar-karvan nahin sar-o-saman dusra
kiije zamir-e-khak ko aadam ki chhan agar
us shakl ka ban aave na insan dusra
ju-ul-baqar rakhe ye shaikh-e-shikam-parast
ik khvan kha kahe hai kahan khvan dusra
sair-e-ajab rakhe hai tiri jalva-gah-e-naz
is lutf ka kahan hai khyaban dusra
naqd-e-dil us ko dena hai ‘hasrat’ savab o farz
us zulf sa na hoga pareshan dusra
Leave a Reply