Maujud Hain Wo Bhi Baalin Par Ab Maut Ka Talna Mushkil Hai

Ajiz Matvi

maujud hain vo bhi balin par ab maut ka Talna mushkil hai

ik-tarfa kashakash naza.a men hai dam ka bhi nikalna mushkil hai

anjane men jo be-rah chale vo raah pe aa sakta hai magar

be-rah chale jo danista bas us ka sambhalna mushkil hai

zahir na sahi dar-parda sahi dushman bhi hifazat karte hain

kanTe hon nigahban jis gul ke us gul ka masalna mushkil hai

hain ishq ki rahen pechida manzil pe pahunchna sahl nahin

raste men agar dil baiTh gaya phir us ka sambhalna mushkil hai

aghaz-e-mohabbat men ‘ajiz’ rukti na thi mauj-e-ashk-e-ravan

anjam ab in ḳhushk ankhon se ik ashk nikalna mushkil hai