Shahbaz Khwaja
safar ka ek naya silsila banana hai
ab asman talak rasta banana hai
talashte hain abhi ham-safar bhi kho.e hue
ki manzilon se udhar rasta banana hai
sameTna hai abhi harf harf husn tira
ghazal ko apni tira a.ina banana hai
mujhe ye zid hai kabhi chand ko asiir karun
so ab ke jhiil men ik da.era banana hai
sukut-e-sham-e-alam tu hi kuchh bata ki tujhe
kahan pe ḳhvab kahan rat-jaga banana hai
usi ko aankh men tasvir karte rahte hain
ab us se haT ke hamen aur kya banana hai
dar-e-havas pe kahan tak jhuka.en sar ‘shahbaz’
zaruraton ko kahan tak ḳhuda banana hai
Leave a Reply