Safar Ka Ek Naya Silsila Banana Hai

safar kā ek nayā silsila banānā hai

ab āsmān talak rāsta banānā hai

talāshte haiñ abhī ham-safar bhī kho.e hue

ki manziloñ se udhar rāsta banānā hai

sameTnā hai abhī harf harf husn tirā

ġhazal ko apnī tirā ā.īna banānā hai

mujhe ye zid hai kabhī chāñd ko asiir karūñ

so ab ke jhiil meñ ik dā.era banānā hai

sukūt-e-shām-e-alam tū hī kuchh batā ki tujhe

kahāñ pe ḳhvāb kahāñ rat-jagā banānā hai

usī ko aañkh meñ tasvīr karte rahte haiñ

ab us se haT ke hameñ aur kyā banānā hai

dar-e-havas pe kahāñ tak jhukā.eñ sar ‘shahbāz’

zarūratoñ ko kahāñ tak ḳhudā banānā hai

Leave a Comment