hans ke paimana diya zalim ne tarsane ke baad
aaj nazuk se lab-e-saqi hain paimane ke baad
khum-kadon men kuchh na hoga ek paimane ke baad
rah nahin sakti kabhi mai-lab tak aa jaane ke baad
main huun saaqi hai shab-e-khalvat hai daur-e-jam hai
bose par bosa hai paimana hai paimane ke baad
vaqt hai aisa tha rukhsat ho gai un ki haya
baat hi aisi thi khul khele vo sharmane ke baad
chhedte hain pa ke mauqa un ke utre haar bhi
bante hain kyuun dil hamara phuul murjhane ke baad
husn ho ya ishq hoti hai buri dil ki lagi
jal-bujhi ro ro ke akhir shama parvane ke baad
kah ke main dil ki kahani kis qadar khoya gaya
hain fasanon par fasane mere afsane ke baad
be-khudi gum-gashtagi sukr-o-tahayyur mahviyat
kuchh maqamat aur bhi padte hain maikhane ke baad
duur tak shohrat hai us ki tuur kahte hain jise
be-charagh ik jalva-gah hai mere virane ke baad
koi hiire ki kani se kam na tha hangam-e-zabt
kuchh hamen piina pade aansu bhi gham khane ke baad
ishq ki tarikh dohrai zamane ne zarur
naam paaya qais ne bhi tere divane ke baad
shor hai rahna qayamat se bahut hi hoshiyar
un ke kuche se uthi hai thokaren khane ke baad
taba ho bhi to kahin divan mera ai ‘riyaz’
dekhne ki chiiz hoga ye sanam-khane ke baad