Ghulam Husain Sajid
aa.ine men aks khilta hai gul-e-hairat nahin
log sach kahte hain ankhon si koi ne.amat nahin
ab bahar-surat sar-e-maidan utarna hai mujhe
kar-zar-e-ishq se paspa.i ki surat nahin
us ke hone se hui hai apne hone ki ḳhabar
koi dushman se ziyada la.eq-e-izzat nahin
sair karna chahta huun main jahan-abad ki
aur ruk kar dekh lene ki mujhe fursat nahin
ishq par faa.ez huun auron ki tarah lekin mujhe
vasl ka lapka nahin hai hijr se vahshat nahin
raat vo aansu baha.e hain ki mere qalb par
sub.h ka aghosh va karna miri ujrat nahin
jis qadar mahmez karta huun main ‘sajid’ vaqt ko
us qadar be-sabr rahne ki use aadat nahin
Leave a Reply