Poet
aur zara kaj miri kulah to hoti
zaat se bahar kahin panah to hoti
mujh ko agar zindagi ne kuchh na diya tha
mere shab-o-roz ki gavah to hoti
kho ga.i manzil to ḳhair gard-e-safar men
jis pe main chalta raha vo raah to hoti
ḳhauf-zada kaash koi mujh ko bhi rakhta
mere liye bhi kahin panah to hoti
lamha-e-maujud dastaras men na hota
lamha-e-maujud par nigah to hoti
aur mujhe ḳhalq se umiid hi kya thi
meri nahin teri ḳhair-ḳhvah to hoti
apne charaghon ki taab dekhte ham bhi
raat tire hijr ki siyah to hoti
us ne mujhe kar diya ḳharab to kya hai
yuun bhi miri zindagi tabah to hoti
shahar se nisbat bhi kuchh nikal hi lete
shahar ke logon se rasm-o-rah to hoti
ḳhaak pe sona hamen qubul tha ‘rashid’
ḳhaak pe kuchh raunaq-e-giyah to hoti
Leave a Reply