Har Nafas Par Ye Guman Hai Ki KHata Ho Jaise

Poet

har nafas par ye guman hai ki ḳhata ho jaise

umr yuun guzri ki jiine ki saza ho jaise

main ba-har-taur huun paband-e-shumar-e-anfas

saaz har haal men majbur-e-nava ho jaise

zindagi amr-e-mashiyyat hai magar kya kahiye

vo nadamat hai koi jurm kiya ho jaise

mujh ko har hadisa-e-asr hua yuun mahsus

mere hi dil ke dhaḌakne ki sada ho jaise

is tarah naaz hai daman-e-tahi par mujh ko

meri mahrumi bhi us ki hi ata ho jaise

ḳhanda-e-gul se bhi ehsas pe yuun choT lagi

mere hi chaak gareban pe hansa ho jaise

yuun nibard-azma har nafs-o-zamir aaj bhi hai

zindagi ma.arka-e-karb-o-bala ho jaise

arsa-e-zehn men yuun fikr hai laghzida ḳhiram

dasht-e-pur-ḳhar men ik abla-pa ho jaise

yuun miri ziist bhi bargashta hai mujh se ‘at.har’

kisi be-mehr ke daman ki hava ho jaise