sharab-e-ishq men kya jaane kya tasir hoti hai
kahin ye zahar hoti hai kahin iksir hoti hai
na mafhum us ka furqat hai na mansha vasl hai us ka
mohabbat asl men ik ḳhvab-e-ḳhud-ta.abir hoti hai
juda ho kar isi men jazb ho jaati hai phir ik din
mohabbat aftab-e-husn ki tanvir hoti hai
mira zauq-e-nazar ho ya tira faiz-e-tasavvur ho
mire a.ine men aksar tiri tasvir hoti hai
shikayat bhi mohabbat hi men daḳhil hai magar ‘bismil’
mohabbat be-niyaz-e-shikva-e-shikva-e-taqdir hoti hai
Leave a Reply