Tajdar Adil
ye bhi mausam ajiib mausam hai
us se bichhḌe hain aur dukh kam hai
mustaqil us ko yaad karta huun
mustaqil ek sa hi aalam hai
ek chehra hai jis ko dekhta huun
ek avaz hai jo paiham hai
tum bhi us ki nishaniyan sun lo
lahja ḳhushbu hai baat shabnam hai
chiḳhta huun use bulane ko
aur avaz phir bhi maddham hai
sochta huun ki main nahin rota
aur miri aankh men baḌa nam hai
vaise hi raste hain saare magar
saath chalta tha jo vahi kam hai
koi milta nahin mohabbat ko
ik ajab furqaton ka aalam hai
mujh se ye gham saha nahin jaata
ghaliban mujh ko ab bahut gham hai
Leave a Reply